Bygdeutviklingspris til Hallingkost

Bygdeutviklingsprisen blir gjeve til bedrifter eller personar som har etablert ei vellukka bedrift eller næring med basis i bygdenes og landbrukets ressursar. Føremålet med prisen er blant anna å synleggjera gode resultat frå landbruksrelatert næringsutvikling.

Hallingkost får prisen for nytenking og godt arbeid gjennom fleire år.

Selskapet slik me kjenner det i dag, starta opp i 2002. Sidan den gongen er medlemstalet tredobla og har no passert 60. Av desse er om lag halvparten produsentar og stølar, resten i hovudsak serveringsbedrifter. Produsentane omset for over 14 millionar kroner. I tillegg kjem det som blir selt på stølane. Bedriftene sysselset over 50 personar i Hallingdal.

Innovasjon Norge i Buskerud framhevar at Hallingkost har lykkast med å få varene ut i butikkar gjennom selskapet Hallingkost Distribusjon. Arbeidet med hallingtapasen – og boka Hallingtapas – blir trekt fram som nytt og spennande. Hallingkost har i sine vedtekter slått fast at selskapet vil vera ein regional utviklingsaktør innan mat, noko initiativet til Norsk Fjellmatsenter er eit døme på. Målet er at eit nasjonalt fjellmatsenter skal vera etablert i løpet av 2010.

Som vinnar av Bygdeutviklingsprisen 2009 i Buskerud, går Hallingkost vidare i konkurransen om den nasjonale Bygdeutviklingsprisen. Det er vinnarane i kvart fylke som konkurrerer om denne prisen.


Under prisutdelinga på Geilo utdjupa Ragnhild Kvernberg ein del av kriteria som var vektlagt ved tildeling av prisen til Hallingkost:


- Kandidaten har vært en pioner i å utvikle lokal matkultur og å presentere den på nye, spennende måter
- Kandidaten har vært en pioner i å bygge nettverk for og mellom både produsenter av lokale matspesialiteter, opplevelsesbedrifter og serveringsbedrifter
- Kandidaten har evnet å innarbeide lokale matspesialiteter som opplevelsestilbud i reiseliv og reiselivsbedrifter i regionen
- Kandidaten har evnet å utvikle en robust distribusjonsløsning med markedsadgang til dagligvaremarkedet i regionen
- Kandidaten framstår som en potent regional utviklingsaktør